Գառնիի անտիկ տաճարին կից VII դարում կառուցվում է Սուրբ Սիոն եկեղեցին: Համաձայն 1346 թ. գրված հիշատակարանի այն կառուցել է Կաթողիկոս Ներսես Գ Տայեցի Շինարարը 659 թ., ով կառուցել է նաև Զվարթնոց տաճարը Էջմիածնի մոտակայքում: Խաչաձև քառաբսիդ հորինվածքով եկեղեցին պարփակված է 24 նիստանի, գրեթե բոլորակ ծավալի մեջ: Խաչաթևերի անկյուններում մեկական ավանդատուն է:

Ըստ ճարտարապետ Տիրան Մարությանի, Սուրբ Սիոն եկեղեցու կառուցողը (ում անունը պատմությունը չի պահպանել) մեծ վարպետությամբ է մոտեցել գործին՝ նախկին հեթանոսական տաճարի կողքին կառուցելով քրիստոնեական եկեղեցի, որը չափերով մեծ է իր հարևան կառույցից, սակայն միաժամանակ չի նսեմացնում այն: Եկեղեցու բոլորակ հորինվածքը հնարավորություն է տվել ամբողջությամբ չծածկել հեթանոսական տաճարի արևմտյան ճակատը: Եկեղեցու հիմնական բազմանիստ ծավալի քիվի բարձրությունը պահված է հեթանոսական տաճարի քիվի բարձրությանը հավասար, նրա ծածկի թեքությունը նույնն է ինչ հեթանոսական տաճարինը:

Նման հորինվածքով հայտնի է ևս երկու հուշարձան՝ Խծկոնքի վանական համալիրի Սուրբ Սարգիս եկեղեցին (1025 թ.) և Մարմաշենի վանական համալիրի բոլորակ եկեղեցին (X-XI դդ.):

Գառնիի Սուրբ Սիոն եկեղեցու մասին ավելի մանրամասն տե՛ս Տիրան Մարության, «Գառնիի բոլորակ տաճարի առանձնահատկությունները», Հայաստանը և Քրիստոնյա Արևելքը, պատ. խմբ. Պ. Մ. Մուրադյան, Երևան, ՀՀ ԳԱԱ «Գիտություն» հրատ., 2000, էջ 217-225: